Nalo 'Ole - Pehea e Ho'i ai i kou 'Āina kulāiwi?

ʻO ka lula kumu nui o nā hoʻokele Hawaiʻi ʻo ia hoʻi: E makaʻala mau i kou pilina henua ma o ka hoʻopaʻanaʻau ʻana i ke ala i hala iho nei, inā mālama ʻia ua lula lā, ʻaʻole nō e nalowale ana.
Ua pili loa ka hoʻokele Polenekia kuʻuna i ka ʻāina kulāiwi, ʻo ia hoʻi hoʻopaʻanaʻau ka hoʻokele i ke ala i holo ʻia mai ka manawa nō i kau ʻia ka peʻa, i holo aku ka waʻa, a i haʻalele i ka ʻāina. He aha ka huina holo? ʻEhia ka lōʻihi a mamao i holo ʻia? Pehea ka lōʻihi o ka manawa i hala? Pehea i hoʻoneʻe ʻia ai ka waʻa e ka makani a me nā ʻale kai mai ke ala kuhi? Ma o ka hoʻopaʻanaʻau ʻana i nā huina i holo ʻia, a me ka lōʻihi a mamao i holo ʻia, mālama maikaʻi ka hoʻokele i kona pilina henua no kahi āna e noho nei ma kai, a me kona pilina i kona home i haʻalele ai.
ʻO ka waiwai o ka mālama ʻana i ua ʻike lā, ʻo ia hoʻi ka hiki ʻana ke kuhi i kahi e hele ai, a me ke ala hoʻi i kona home i nā manawa a pau. I loko no o ka lawe hewa ʻia o ka waʻa e ka makani me nā ʻau moana, i loko nō o ka loaʻa ʻole o ka ʻāina hou, ua hiki nō ke hoʻi i kona ʻāina kulāiwi ma ka hahai ʻana i nā kuhina i hoʻopaʻanaʻau ʻia. ʻAʻole nō i hiki ke nalowale inā ua maopopo pehea e hoʻi ai i kou home.