Skip to main content

Nā Piliolana

Nā Piliolana

ben finney portrait

He mea hulikanaka ʻo Ben Finney i kālele ma ka hulikanaka moʻomeheu a me ke kālailauna kanaka. Ua noiʻi a kākau nui ʻo ia no nā kumuhana, ʻo ka heʻenalu ʻoe, ke aukanaka o Moananuiākea, ka hoʻokele mauhaʻa ʻole, ke kālai waʻa, a me ka hoʻopanalāʻau ʻia o nā wahi e kānaka. I ka makahiki 1973 i hoʻokahua puwalu ai ʻo Dr. Finney i ka Polynesian Voyaging Society me ke kaha kiʻi ʻo Herb Kawainui Kāne, a me ka holokai Hawaiʻi ʻo Tommy Holmes. Ua kūkulu lākou iā Hōkūleʻa, he waʻa e kūlike ana i ka waʻa kaulua o ka wā kahiko. I ka makahiki 1976 i kō ai ka holomoana ʻana o Hōkūleʻa mai Hawaiʻi a i Polapola. Ua hoʻokele piha ʻia me ka mauhaʻa ʻole. Ua nui kā Dr. Finney hana ma ka hoʻōla hou ʻana i ia hana kuʻuna o ka hoʻokele waʻa.

bruce blankenfeld portrait

He kupa ʻo Bruce Blankenfield no ke awāwa ʻo Niu ma ka mokupuni o Oʻahu. He kanaka hoe waʻa a he kaʻi ʻo ia no ka Hui Nalu Canoe Club. He kāpena a he loea hoʻokele pū ʻo ia i hoʻomaka mua ma ka holomoana ʻana me ka Polynesian Voyaging Society i ka makahiki 1977. Ua holo nui ʻo ia a puni o ka Pākīpika me ke kipa ʻana aku i nā awa kū moku o Polapola, Lalokona, Aotearoa, Tonga, Kāmoa, Rangiroa, Nuʻuhiwa, Mangareva, Rapa Nui, Maikonesia, Iāpana, Kanakā, a me ʻĀlaka. I ka makahiki 2007, ua hoʻokohu ʻia ʻo Bruce me ʻehā hoʻokele kanaka maoli ʻē aʻe ke kūlana Pwo, ke kūlana loea hoʻokele nō hoʻi, e ka loea hoʻokele nui ʻo Mau Piailug ma kahi ʻaha kuʻuna i mālama ʻia ma ka mokupuni ʻo Satawal. Mai ia hoʻokohu ʻana i ʻāpono ʻia ʻo ia e noho i ka ʻahahui o nā loea holokai.

catherine fuller portrait

ʻO Catherine Fuller ka Luna Hope ma ʻIolani Elementary School. He hoe waʻa ʻo ia no ka Hui Nalu Canoe Club. He kāpena a he hoʻokele waʻa ʻo ia mai Honolulu ma ka mokupuni o Oʻahu. He lālā ʻo ia o ka Polynesian Voyaging Society mai ka makahiki 1993. ʻO ia nō kekahi o nā kanaka hoʻokele waʻa mua o ko ka ʻAha Pūnana Leo waʻa kaulua ʻo Hōkūalakaʻi. I ka makahiki 1995 i holo ai ʻo ia ma ka waʻa kaulua mai Hawaiʻi a i ka Pae Moku Taiete a me Nuʻuhiwa. Ua holo pū ʻo ia ma ke ʻano he haumāna hoʻokele ma ka pae ʻelua o ka holomoana o ka makahiki 1999 i Rapa Nui a i Nuʻuhiwa, a mai Nuʻuhiwa aku i Mangareva.

chad kalepa baybayan portrait

Ua hoʻomaka ʻo Chad Kālepa Baybayan i ka holomoana ʻana i ka makahiki 1975 iā Hōkūleʻa e mouo ana ma kahi o kona hale ma ko Hōkūleʻa hoʻomaʻamaʻa holokai mua a puni o Hawaiʻi pae ʻāina. Ua paʻa ka ʻike holomoana iā ia mua ma luna o Moʻolele, ka waʻa kaulua o ka ʻahahui hoʻokele ʻo Hui o Waʻa Kaulua ma ka makālae Kona o ka mokupuni ʻo Maui. Ua komo ʻo Kālepa ma nā hoʻokele nui a pau o Hōkūleʻa mai ka makahiki 1980 aku. Ma ke ʻano he hoʻokele waʻa i holomoana ai ʻo ia i Polapola, Lalokona, Aotearoa, Tonga, Kāmoa, Rangiroa, Nuʻuhiwa, Pitikeina, Mangareva, Rapa Nui, Maikonesia, Iāpana, Kanakā, Wakinekona, a me Kaleponi. I ka makahiki 2007, ua hoʻokohu ʻia ʻo Kālepa a me ʻehā hoʻokele kanaka maoli ʻē aʻe ke kūlana Pwo, he kūlana loea hoʻokele nō hoʻi ia. Na ka loea hoʻokele ʻo Mau Piailug i ʻāpono i ko Kālepa noho ʻana ma ka ʻahahui o nā loea holokai o nā hoʻokele holomoana. Ua hana ʻo Kālepa ma ke ʻano he hoʻokele ma ʻImiloa Astronomy Center o Hawaiʻi a ma ke ʻano he kāpena a hoʻokele o ko Hilo waʻa kaulua ʻo Hōkūalakaʻi.

chadd 'onohi paishon portrait

He hoʻokele ʻo Chadd ʻOnohi Paishon mai ka makahiki 1990. Ua nui kāna hana hoʻokele mai kahi ʻaoʻao o ka pōʻai waena honua i kahi ʻaoʻao ma luna o Hōkūleʻa a me Makaliʻi. No kona ʻiʻini nui e ʻimi naʻauao ma ka hana hoʻokele waʻa kuʻuna i piʻi koke aʻe ai ʻo ʻOnohi i ke kūlana kiʻekiʻe o ka hoʻokele a i lilo ai ʻo ia i kāpena pū kekahi. I kēia mau lā, hana ʻo ia ma ke ʻano he Poʻo Kuhikuhi o Nā Kālai Waʻa Moku o Keawe, he hui hoʻokele, kahi i mālama ai ʻo ia i nā polokalamu hoʻonaʻauao hoʻokele. He kanaka hīmeni pū ʻo ia i hoʻohauʻoli i ka poʻe waʻa me kona leo nahenahe. I ka makahiki 2007, ua hoʻokohu ʻia ʻo ʻOnohi me ʻehā hoʻokele kanaka maoli ʻē aʻe ke kūlana Pwo, ke kūlana loea hoʻokele nō hoʻi. Na ka loea hoʻokele ʻo Mau Piailug i ʻāpono iā ia e noho ma ka ʻahahui o nā loea holokai.

Herb Kāne portrait

He kaha kiʻi ʻo Herb Kāne i kaulana a puni ka honua. He kanaka hoʻopaʻa moʻokūʻauhau, a he kanaka kākau moʻolelo ʻo ia i hānai ʻia ma ke awāwa ʻo Waipiʻo ma ka mokupuni ʻo Hawaiʻi. Nāna i hoʻokahua puwalu i ka Polynesian Voyaging Society, ka ʻahahui i hoʻōla hou i ka hana hoʻokele waʻa kuʻuna i kēia au ma o ke kālai ʻia ʻana o ka waʻa kaulua ʻo Hōkūleʻa a me ka hoʻomau hou ʻia o ka hoʻokele mauhaʻa ʻole. I ka makahiki 1984, ua hoʻokohu ʻia ʻo Herb Kāne ke kūlana Living Treasure of Hawaiʻi. ʻO kāna hana pāheona, he ala ia e kīpaipai ʻia ai no nā ʻōiwi o ka Pākīpika a he kumuwaiwai ia e hōʻike ana i kekahi mau moʻolelo koʻikoʻi o ko kākou mōʻaukala.

john stallman portrait

Ua hānau a hānai ʻia ʻo John Stallman ma ʻIkahō, kahi i ulu ai kona aloha no ke ao kūlohelohe i kona wā ʻōpio. He palapala Laepua kāna ma ka ʻepekema kālaimeaola mai ke Kulanui ʻo Puget Sound ma Takoma, Wakinekona. ʻO kāna mēkia ke kālaimeaola e kālele ana ma luna o nā meakino ola a me ke kālaimeaola kai. Ma hope o kona puka kula ʻana i hoʻololi koke ai ʻo John i kāna ʻoihana i ka hana kilo kai me ka ʻoihana lawaiʻa kai ma lalo o NOAA. Ma hope mai o kāna hana kilo kai i kālele ai ʻo John ma ke kālailai nahele. He mau makahiki kona kilo ʻana i nā meakanu laha ʻole o ka paeʻāina ʻo Hawaiʻi. Ua hana ʻo John ma ke ʻano he alakaʻi mākaʻikaʻi kaiaola, ma ke ana ʻana i nā ululāʻau ʻōiwi no ka Mokuʻāina ʻo Hawaiʻi, a ma ke alakaʻi ʻana i ka noiʻi ʻepekema no ka National Park Service. I kēia manawa ke hana nei ʻo John ma ke ʻano he lanakia unuhi ma Hawaiʻi Volcanoes National Park. Ma kona manawa kaʻawale e kūkā ai ʻo ia me nā haku ʻāina o ka mokupuni ʻo Hawaiʻi e hoʻonaʻauao ai iā lākou no ke koʻikoʻi o ka mālama ʻana i nā kumumea o nā ululāʻau ʻōiwi ma ko lākou mau ʻāina pilikino.

ka'iu kimura portrait

 

Ua hānau a hānai ʻia ʻo Kaʻiu Kimura ma Waimea i ka mokupuni ʻo Hawaiʻi. Ua hana ʻo ia ma ke ʻano he mea waʻa ma nā waʻa hoʻokele ʻo Makaliʻi, Hōkūalakaʻi, a me Hōkūleʻa. He hoe waʻa a hoʻokele ʻo ia no Keaukaha Canoe Club. Ua komo ʻo ia ma ka hoʻokele o ka makahiki 2007 i Satawal a me Iāpana. I ka makahiki 2009 i puka ai ʻo ia me kāna palapala Laeoʻo e kālele ana ma ka ʻōlelo Hawaiʻi a me ka moʻokalaleo mai Ka Haka ʻUla o Keʻelikōlani ma ke Kulanui o Hawaiʻi ma Hilo. I kēia mau lā, hana ʻo ia ma ke ʻano he Poʻo Kuhikuhi o ka ʻImiloa Astronomy Center of Hawaiʻi, he kikowaena ʻepekema ia e hoʻohanohano nei i nā hoʻokō ʻana o nā ʻimi loa moana a me ke kilo hōkū poʻokela ma ka piko o Maunakea.

ka'iulani murphy portrait

 

ʻO Kaʻiulani kekahi Hawaiʻi no Waimea ma ka moku o Keawe. I ka makahiki 1997, ma ke ʻano he haumāna ma ka University of Hawaiʻi at Mānoa, ua komo ʻo ia i ka Polynesian Voyaging Society. Ua hoʻokele ʻo ia i ka huakaʻi i Rapa Nui mai ka makahiki 1999-2000, ka Voyage to the Kūpuna Islands i ka makahiki 2004, a me nā huakaʻi hoʻokele ma ka makahiki 2007 i Maikonesia a me Iāpana. He kumu ʻo ia ma ke Kulanui Kaiāulu o Honolulu a mau kona kōkua ʻana i ke kaiāulu hoʻokele ma o nā papahana hoʻonaʻauao. He poʻo hoʻokele ʻo Kaʻiu e mohala aʻe nei ma o nā ʻōpio o Hawaiʻi e aʻo hou nei i ka noʻeau hoʻokele.

Kailin Kim portrait

 

No Kamiloʻiki ma ka mokupuni o Oʻahu ʻo Kailin Kim. He haumāna ʻo ia ma ke Kulanui o Hawaiʻi ma Hilo. Ua hana ʻo ia ma ka Polynesian Voyaging Society mai ka makahiki 2005. I ka makahiki 2009 i holomoana ai ʻo ia ma ke ʻano he mea waʻa ma luna o Hōkūleʻa ma kekahi huakaʻi mai Palmyra Atoll a i Hawaiʻi. I kēia manawa, ke hoʻopaʻa nei ʻo Kailin e lilo i hoʻokele.

Kaimana Barcarse portrait

No Waiākea mai ʻo Kaimana Barcarse mai ka mokupuni ʻo Hawaiʻi. Ua hoʻomaka ʻo ia i ka holomoana ma ka makahiki 1999 ma ke ʻano he mea waʻa me Kālepa Baybayan a ua kākoʻo pū ʻo ia ma ke kūkulu ʻia ʻo Hōkūalakaʻi. He hoʻokele moana a he kāpena ʻo ia i aʻo pū i nā pae like ʻole e pili ana i ka holomana a me ka hoʻokele waʻa, ke kālailau nahele, ke kālai ʻano holoholona, ka pāpaho ʻōiwi, a me ke alakaʻina Hawaiʻi. I kēia mau lā, hana ʻo ia ma Ke Kula ʻo Kamehameha no ka hoʻoholomua i ka nohona o nā kānaka Hawaiʻi ma ka ʻaoʻao ʻāina, hoʻonaʻauao, a moʻomeheu Hawaiʻi. Ua hana pū ʻo ia me nā hui aupuni ʻole, nā nāki, a me nā hui kaiāulu a puni ka honua no ke kākoʻo i kā lākou hana e pili ana i ka hoʻōla ʻōlelo, moʻomeheu, a me nā hana waʻa kuʻuna. He luna hope ʻo ia no ka Hawaiʻi State Board of Education a he luna hoʻopuka ma ka polokalamu lekiō Hawaiʻi ʻo “Alana I Kai Hikina” ma KWXX-FM.

Kalena Silva portrait

 ʻO Kalena Silva ke Poʻo o Ka Haka ʻUla o Keʻelikōlani College of Hawaiian Language ma ke Kulanui o Hawaiʻi ma Hilo a he polopeka Haʻawina Hawaiʻi hoʻi ʻo ia. Ma waho aku o kona mau kuleana ma ke ʻano he Poʻo, aʻo ʻo Dr. Silva i nā papa ʻōlelo Hawaiʻi, moʻokalaleo, moʻomeheu, a me ka pāhiahia ma nā pae mua puka a muli puka o ke koleke. Mai kona hoʻomaka ʻana i ke aʻo kula kaiapuni Hawaiʻi o kēia au—ma ka Papahana kula kamaliʻi a ka ʻAha Pūnana Leo, a ma hope mai ma ka Papahana Kula Kaiapuni Hawaiʻi o ka ʻOihana Hoʻonaʻauao o ka Mokuʻāina o Hawaiʻi—na Dr. Silva i haku i mau haʻawina hoʻonaʻauao ʻōlelo Hawaiʻi no ka pae kula kamaliʻi a i ka papa 12. Helu ʻia i loko o ka papa haʻawina nā moʻolelo hakupuni, mele, a me nā unuhi Hawaiʻi no ka ʻepekema a pilikanaka. I loko o ke aʻo kumu kaiapuni Hawaiʻi ma ke Kulanui o Hawaiʻi ma Hilo, ua hoʻokumu pū ʻo ia i nā papa moʻokalaleo kuʻuna, kākāʻōlelo, mele, oli, a hula hoʻi.

Na Silva i hana, aʻo, a haʻi aʻo i ka puolo Hawaiʻi, hula, a me ka ʻōlelo ma Hawaiʻi a ma waho aku. Ua hana pū ʻo ia ma ke ʻano he luna loiloi no kekahi mau hoʻokūkū pāhiahia Hawaiʻi nui e like me ka Mele Manaka a me ke komo ʻana i ka haku hōʻike kūhahaʻi wikiō no nā ola koʻikoʻi o nā Hawaiʻi kaʻapeha.

Milton(Shorty) Bertelmann portrait

 

He hoʻokele waʻa ʻo Milton (Shorty) Bertelmann i holo ma ka hoʻokele mua o Hōkūleʻa i Polapola ma ka makahiki 1976. Iā ia e hoʻomākaukau ana no ia hoʻokele i hoʻomaka ai ʻo Shorty e aʻo mai ka loea hoʻokele ʻo Mau Piailug. Ma o kēia aʻo ʻana i ulu ai ko lāua pilina ʻohana ma o ka holo o ka manawa. Ua holo aku ʻo ia Polapola, Aotearoa, Kāmoa, Rangiroa, Nuʻuhiwa, a me Maikonesia. Ua ʻike ʻia kona ʻano alakaʻi ma ka hana a hōʻihi nui ʻia ʻo Shorty ma ke kaiāulu holokai. I ka makahiki 2007, ua hoʻokohu ʻia ʻo Shorty me ʻehā hoʻokele kanaka maoli ʻē aʻe ke kūlana Pwo, ke kūlana loea hoʻokele nō hoʻi, e ka loea hoʻokele ʻo Mau Piailug ma Satawal. Ua ʻāpono pū ʻia kona noho ma ka ʻahahui o nā loea holokai.

Nainoa Thompson portrait

ʻO Nainoa Thompson kekahi hoʻokele Hawaiʻi a me ka Luna Hoʻokō o ka Polynesian Voyaging Society. Ua aʻo ʻo ia ma lalo o ka loea hoʻokele ʻo Mau Piailug no ka mokupuni ʻo Satawal. ʻO Mau Piailug ka hoʻokele ma luna ʻo ko Hōkūleʻa hoʻokele mua loa i Polapola i ka makahiki 1976. I ka makahiki 1980 i hoʻokele pākahi ai ʻo Nainoa Thompson mai Hawaiʻi i Tahiti. Mai ia manawa aku, ua lilo ʻo Thompson i alakaʻi hoʻokele ma nā huakaʻi he nui o Hōkūleʻa. Ma ka lā 18 o Malaki i ka makahiki 2007, ua hoʻokohu ʻia ʻo Thompson me ʻehā hoʻokele Hawaiʻi ʻē aʻe ke kūlana Pwo, ke kūlana loea hoʻokele nō hoʻi, e Mau Piailug ma kahi ʻaha kuʻuna i mālama ʻia ma ka mokupuni ʻo Satawal. Ua ʻāpono pū ʻia ʻo ia e noho i ka ʻahahui o nā loea holokai.

Nelson Lamona Shintani portrait

 

He mānaleo ʻo Nelson Lamona Shintani no Niʻihau. Ma kona wā kamaliʻi i nui ai kāna hana hānai holoholona a me ka lawaiʻa. Mai ia mau hana i ulu ai kona mau mākau kā ʻupena a me ka haku i nā ʻano mea like ʻole me ka ʻili pipi. ʻO ia ke poʻo pākaula o Hōkūalakaʻi, ka waʻa kaulua ma ke awa kū moku o Hilo. Ua huakaʻi ʻo ia ma Hōkūleʻa ma ka makahiki 1999 i Managareva a ua huakaʻi pū ʻo ia i Iāpana ma ka makahiki 2007. ʻOiai ʻo ia he mānaleo, aʻo aku ʻo ia i ka ʻōlelo Hawaiʻi i nā haumāna hoʻokele waʻa o Hōkūalakaʻi.

Pa'anaakala (Kala) Baybayan

 

No Maui mai ʻo Pāʻanaakalā (Kalā) Baybayan. Ua puka ʻo ia mai ke Kulanui o Hawaiʻi ma Hilo, kahi i kālele ai ʻo ia ma ke aʻo i ka ʻōlelo Hawaiʻi a me kāna mēkia o ka ʻepekema politika. No ka nui o kona hoihoi i ka hoʻokele waʻa kuʻuna i komo ai ʻo ia ma ka hoʻokele ʻana iā Hōkūalakaʻi a i aʻo pū ai ʻo ia ma lalo o kona makuakāne, ʻo Kālepa Baybayan. Ua holo ʻo ia ma Hōkūleʻa i Iāpana ma ka makahiki 2007.

Paul Coleman

He kanaka kālaikūlohea kilo hōkū Hawaiʻi ʻo Paul Coleman ma ka Institute for Astronomy ma ke Kulanui o Hawaiʻi. Ua loaʻa iā ia kāna kēkelē Laepua ma ke Kulanui ʻo Notre Dame a me ke kēkelē Laeʻula ma ke Kulanui o Pittsburgh ma ka makahiki 1985. Ma hope o kāna hana muli laeʻula ma Nekelana a me Pokoliko, ua hoʻi ʻo Paul i Hawaiʻi, a kālele kāna noiʻi kilo hōkū lekiō ma luna o ka ʻōnaeao laulā, ka puʻukehu, ke kōwā/ka haka kau hōkū, a me ka wiliau hōkū. Aʻoaʻo ʻo Polopeka Coleman i ka haumāna Laepua o ka papahana ʻo Research Experience for Undergraduates i hoʻolako ʻia e ka NSF. Hana ʻo ia ma ke ʻano he ala e pili ai ke kaiāulu Hawaiʻi me ke kaiāulu kilo hōkū ma Maunakea ma o ka paipai ʻana i ka pale ʻia o ka ʻāina a me ka mālama mau ʻana i ka loina Hawaiʻi ma ka mauna.

Pius (Mau) Piailug

 

ʻO Pius (Mau) Piailug ka loea hoʻokele no ka moku Maikonesia ʻo Satawal. Nāna i hoʻihoʻi mai i ka ʻike kuʻuna no ka  hoʻokele waʻa i Hawaiʻi. Na Mau i alakaʻi iā Hōkūleʻa mai Hawaiʻi i Polapola ma kona hoʻokele mua loa i ka makahiki 1976.  He kumu ʻo ia na ka Hawaiʻi ʻo Nainoa Thompson. Ua hānau ʻia ʻo ia ma Satawal i ka makahiki 1932. Na kona kupunakāne i aʻo i ka ʻike hoʻokele waʻa iā ia mai kona wā kamaliʻi. Ua hoʻokohu ʻia ʻo Mau Piailug ke kūlana Pwo, ke kūlana loea hoʻokele, i ka piha ʻana iā ia he 18 makahiki. I ka makahiki 2007, i hoili aku ai ʻo Mau i ke kūlana Pwo ma luna o ʻelima hoʻokele kanaka maoli ma Satawal.

Pomai Bertelmann

ʻO Pomai Bertelmann ke kaikamahine a Clayton Bertelmann. ʻO Clayton Bertelmann ka mea nāna i hoʻokumu aku iā Nā Kālai Waʻa Moku o Keawe. Nā ia nei pū i kālai i ka waʻa holomoana ʻo Makaliʻi, a ʻo ia ke kāpena mua loa o ia waʻa. Ma o ka hoʻohana ʻana i ka ʻike a kona mau kūpuna ʻaumoana a me kona mau kūpuna kahu pipi i hoʻoili mai ai, ua walea ʻo Pomai i ka holomoana ʻana i loko nō o ka nui o nā mea i paʻakikī ai ka holomoana ʻana. Ua hele ʻo ia ma nā huakaʻi holomoana he nui mai ka Pākīpika ʻākau a i ka hema ma luna o nā waʻa ʻo Makaliʻi lāua ʻo Hōkūleʻa. Ma ka makahiki 2007 ʻo ia i holomoana aku ai i Maikonesia a me ka mokupuni ʻo Satawa ma ke ʻano he mea waʻa o ka waʻa ʻo Alinganomaisu, he kanalimakūmāhiku mau kapuahi ka lōʻihi o ia waʻa kaulua. ʻO ka waʻa ʻo Alinganomaisu ka hua i loaʻa mai kekahi pāhana i hoʻomaka ʻia e Clayton Bertelmann. ʻO ka pahuhopu o ia pāhana ka makana ʻana aku i waʻa kaulua pilikino iā Mau Piailug i hiki ai iā ia ke hoʻohana i ia waʻa e aʻo ai i ke keiki o kona ʻāina. I kēia mau lā e hoʻomau nei ʻo Pomaikaʻi i ka hoʻoilina o kona makua kāne ma o ka mālama ʻana i nā papahana hoʻonaʻauao no nā kaiāulu o ka ʻaoʻao Kona o ka moku ʻo Hawaiʻi.

Wiliama Ka'ohelauli'i

 

He mānaleo ʻo Wiliama Kaʻohelauliʻi i hānai ʻia ma ka mokupuni ʻo Niʻihau. ʻOiai he mea waʻa hou ʻo Wiliama, ʻo kona kuleana nui ka hana ʻana ma ke ʻano he alakaʻi ʻōlelo Hawaiʻi no nā mea waʻa o ka waʻa ʻo Hōkūalakaʻi, ka waʻa holomoana hoʻi o ka hui hoʻōla ʻōlelo Hawaiʻi ʻo ʻAha Pūnana Leo. 

William K. (Billy) Richards, Jr.

He kupa ʻo William K. Billy Richards Jr. o Kailua, o ka ʻaoʻao Koʻolau o Oʻahu. Aia ʻo ia e hana nei ma ke ʻano he Pelekikena o nā hui ʻo “Friends of Hōkūleʻa” a me Hawaiʻiloa, a he luna hoʻomalu mua ʻo ia o ka hui waʻa ʻo ʻOhana Waʻa. Ua eʻe mua ʻo Billy i ka Hōkūleʻa ma ka māhina ʻo Mei o ka makahiki 1975, a ua holomoana pū ʻo ia ma kā ka Hōkūleʻa huakaʻi holomoana mua loa i Tahiti ma makahiki 1976. ʻOiai he mea waʻa mua ʻo Billy, ua komo ʻo ia i nā ʻano mea like ʻole e laʻa me ka Voyage of Discovery (1985-1987), No Na Mamo (1992), a me Na ʻOhana Holo Moana (1995) ma ka waʻa ʻo Makaliʻi ma kona huakaʻi holomoana mua loa i Tahiti. Ma ka makahiki 2007 ʻo ia i komo ai i Ku Holo Mau, i ka huakaʻi holomoana nui hoʻi a ko ka Hōkūleʻa i ka ʻāina hānau o Mau Piailug, i Satawal. Ma waho aku o ka holomoana ʻana, hana ʻo Billy ma ke ʻano he Poʻo Hoʻokaʻaʻike no Partners in Development Foundation, he hui hana manawaleʻa e lawelawe ana i ke kaiāulu kanaka Hawaiʻi ma o nā papahana hoʻonaʻauao a lawelawe kōkua pū.